ببلو, رکشہ اور نومولود بچی

ببلو, رکشہ اور نومولود بچی

بھارت کے علاقے بھرت پور کے رہائشی رکشہ ڈرائیور ببلو معاشی اور سماجی لحاظ سےکمزور سہی لیکن ’بیٹی‘ ان کے لیے ایک نعمت ہے۔

ببلو دلت ہیں اور بھرت پور میں سائیکل رکشہ چلاتے ہیں۔ انہیں گزشتہ ایک ماہ سے اپنی نومولود بیٹی کو سینے سے لگائے بھرت پور شہر میں رکشہ چلاتے دیکھا جا رہا ہے کیونکہ اس نوزائیدہ کے پیدا ہوتے ہی ماں کا سایہ اٹھ گیا۔گھر میں کوئی اور نہیں جو اس ننّھی پری کا خیال رکھ سکے۔

ہوا کے تھپیڑوں اور رکشے پر جھولتي زندگی کی مشکلات نے اس ننھی پری کو بیمار کر دیا۔ وہ دو دن سے بھرت پور کے سرکاری ہسپتال میں داخل ہے۔

ببلو، ننھی بیٹی اور رکشہ، انسانی رشتوں کی ایسی مثلث بناتے ہیں جس سے بیٹی کو نظر انداز کرنے والے اس معاشرے میں امید کی کرن دور سے ہی نظر آتی ہے۔

ببلو اور ان کی بیوی شانتی کو گزشتہ ماہ ہی پندرہ سال بعد پہلی اولاد کے طور پر بیٹی نصیب ہوئی تھی۔ مگر جلد ہی اس ننھی پری کو ماں کے سکھ اور شفقت سے محروم ہونا پڑا۔

ببلو نے بتایا کہ خون کی کمی کے باعث شانتی کی حالت بگڑی اور وہ زچہ بچہ دونوں کو ہسپتال لے گیا۔

ببلو کا کہنا تھا ’ڈاکٹر نے خون لانے کے لئے کہا، میں خون لے کر آیا، لوٹا تو پتہ چلا کہ شانتی کی سانس ہمیشہ کے لیے اکھڑ گئی، میری آنکھوں کے آگے اندھیرا پھیل گیا‘۔

’خود کو ننھی بیٹی کی خاطر سنبھالا‘، یہ کہتے کہتے ببلو کی آنکھیں بھر آئیں۔ انہوں نے بتایا کہ کس مشکل سے انہوں نے بیوی کی آخری رسومات کے لیے پیسے جمع کیے۔

اپنی بیوی کی موت کے بعد بیٹی کی پرورش کی ذمہ داری ببلو پر آن پڑی۔ انہوں نے بیٹی کو کپڑے کے جھولے میں ڈال کر اپنی گردن سے لٹکا لیا۔

بھرت پور نے یہ منظر دیکھا ہے جس میں ببلو رکشے چلا رہا ہے، گلے میں نومولود بیٹی کو لٹکائے ہوئے ہے اور پیچھے سواریاں بیٹھی ہیں۔ ببلو کہتا ہے ’ہمدردی کے الفاظ تو بہت ملے، لیکن اسے کوئی مدد نہیں ملی۔ رشتہ داروں نے بھی کوئی مدد نہیں کی‘۔

ببلو کے کندھے پر بوڑھے والد کی ذمہ داری بھی ہے۔ وہ کہتے ہیں ’کبھی کبھی کرایے کے کمرے میں والد کے ساتھ بیٹی کو چھوڑ جاتا ہوں، بیچ بیچ میں اسے کھلانے لوٹ آتا ہوں۔ یہ شانتی کی امانت ہے، اس لیے میری ذمہ داری اور بڑھ جاتی ہے‘۔

ببلو کا ایک کمرے کا گھر کرایے کا ہے۔ وہ پانچ سو روپے ماہانہ کرایہ دیتا ہے۔ پھر ہر روز اسے تیس روپے رکشے کے لیے کرایہ ادا کرنا پڑتا ہے۔ ان مشکلات کے درمیان ببلو رکشا چلا کر بیٹی کے لیے باپ کی ذمہ داری بھی نبھا رہا ہے۔

ببلو کا کہنا ہے کہ ’شانتی تو اس دنیا میں نہیں ہے لیکن میری خواہش یہ ہے کہ اس کی وراثت پھولے پھلے، میرا خواب ہے اسے بہترین تعلیم ملے۔ ہمارے لیے وہ بیٹے سے بھی بڑھ کر ہے‘۔

بہت سے لوگ اپنی لڑکی کو لاوارث چھوڑ جاتے ہیں کیونکہ انہیں بیٹی بوجھ لگتی ہے لیکن ببلو کی کہانی بتاتی ہے بیٹی کو پالنے کے لیے ہستی اور حیثیت ہونا ضروری نہیں۔ بس باپ کے دل میں اس کی خواہش ہونا کافی ہے۔ بشکریہ بی بی اسی اردو

مکمل تحریر اور تبصرے >>>

بریکنگ نیوز

بریکنگ نیوز

رمضان المبارک کا پہلا روزہ     2012-07-20

27 رمضان المبارک                 2012-08-14 

14 اگست 1947ء ۔۔۔ 27 رمضان المبارک کو پاکستان آزاد ہوا تھا۔

65 سال بعد یہ دن دوبارہ آنے والا ہے۔

تمام پاکستانیوں کو برکتوں اور رحمتوں والی آزادی مبارک ہو۔

مکمل تحریر اور تبصرے >>>

رمضان کریم مبارک

رمضان کریم مبارک

عشق قاتل سے بھی، مقتول سے ہمدردی بھی
یہ بتا کس سے محبت کی جزاء مانگے گا ۔۔؟
سجدہ خالق کو بھی، ابلیس سے یارانہ بھی
حشر میں کس سے عقیدت کا صلہ مانگے گا۔۔؟

تمام عالم اسلام کو رمضان شریف کی رحمتیں اور برکتیں مبارک ہوں۔

مکمل تحریر اور تبصرے >>>

پاکستانی اور امریکی مسلمان میں فرق

پاکستانی اور امریکی مسلمان میں فرق

پاکستانی اور امریکی مسلمان میں فرق

مکمل تحریر اور تبصرے >>>

ہم صرف امریکہ کے فرنٹ لائن اتحادی ہیں

ہم صرف امریکہ کے فرنٹ لائن اتحادی ہیں

سیدھی سے بات ہے زندہ رہنے کے لئے کھانا ضروری ہے۔ سانس لیتی جو مخلوق سبزی، چارہ شوق سے کھاتی ہے وہ سبزی خور کہلاتی ہے اور جس کی نبض چلنے کا دارومدار محض گوشت پے ہوتا ہے وہ مخلوق گوشت خور کہلاتی ہے۔ بھوک انسان کے قابو میں نہیں، اس کے سامنے جو کچھ بھی آئے وہ ہڑپ کر جاتا ہے اس لئے ہمہ خور کہلاتا ہے۔ جو کچھ نہیں کھاتا وہ کوئی ولی، درویش ہا پھر شوگر کا مریض ہی ہو سکتا ہے۔
ہمہ خوری کے باوجود انسان کی گوشت خوری اور سبزی خوری کا تناسب نکالا جائے تو اس کی شرح ٧٠ اور ٣٠ کی بنتی ہے۔ گوشت انسان کے لئے مرغوب ہو چکا ہے جس کی وجہ سے آلودگی نے بھی اس چسکے کا گھر دیکھ لیا ہے جو انسان کو لگ چکا ہے۔ ابتداء جانوروں کے کچے گوشت سے ہوئی جو آہستہ آہستہ آلودہ ہونا شروع ہو گئی۔ نیوٹریشنسٹ بتاتے ہیں کہ جتنی غذائیت، لذت، وٹامنز اور طاقت کچے یا نیم بریاں گوشت میں ہوتی ہے وہ مکمل پکے ہوئے یا گلے ہوئے گوشت میں نہیں ہو سکتی۔ انسان یہی کچا گوشت عرصہ دراز تک کھاتا رہا، آج بھی مچھیرے بھون کر یا پکا کر مچھلی کھانے کو مچھلی کی توہین سمجھتے ہیں، وسطی افریقہ کے بہت سے قبائل آج بھی کچا گوشت کھاتے ہیں یا زیادہ سے زیادہ دھوپ میں خشک کیا ہوا گوشت کھانے کو ہی ترجیح دیتے ہیں۔
وقت نے چند قدم مزید لئے۔ گوشت آگ پر براہ راست بھون کر کھایا جانے لگا، اس سے لذت میں اضافہ ہوا لیکن اس کی تاثیر اور وٹامنز مرنے لگے۔ بھنے ہوئے گوشت کے بعد ہنڈیا میں ڈال کر گوشت کو گھی میں بگھار دیا جانے لگا، اس سے بھی چسکے میں تو اضافہ ہوا لیکن وٹامنز اور غذائیت اسی قدر کم ہو گئے۔ بگھارے ہوئے گوشت میں بعدازاں تیز مرچوں، پیاز لہسن اور ادرک کا اضافہ کر کے اس کی طاقت مزید کم کر دی گئی۔ کھانوں نے مزید ترقی کی۔ مرچ، ادرک، پیاز، ٹماٹر کے ساتھ گھی میں بگھارے ہوئے گوشت کی اصل غذائیت کا مزید ستیاناس مارنے کے لئے گرم مصالحوں نے امریکہ جیسا کردار ادا کیا۔ اب ہنڈیا میں جب چوب چینی، دار چینی، چاروں نمک، ہلدی، فلفل سیاہ، زیرہ سفید، کالی مرچ، مرچ کلاں، لونگ، دھنیا اور دیگر مصالحہ جات کا پسا ہوا آمیزہ ڈالا جاتا ہے تو اس کی لذت میں تو اضافہ ہو جاتا ہے لیکن غذائیت، وٹامنز اور طاقت کا وہی حال ہوتا ہے جو عراق میں صدام حسین یا افغانستان میں طالبان کا ہوا۔
کھانے کا مزید بیڑا غرق ان ککوں، باورچیوں، شیفوں اور فارغ بیٹھی گھریلو خواتین نے کیا جنہوں نے پگمنٹس میں ذرا ذرا سی تبدیلی کر کے لاکھوں رنگ بنا دیئے۔ کمپیوٹر کی انسٹنٹ آرٹسٹ، کورل ڈرا یا اڈوب فوٹو شاپ کھول کر دیکھ لیں چاروں پگمنٹس کے باہمی ملاپ اور ان کے تناسب کو بدل بدل کر آُپس میں ملاتے جائیں تو پچیس لاکھ کے قریب رنگ بن جاتے ہیں۔ گوشت کے ساتھ بھی یہی ہوا، کھانے کی کوئی بھی کتاب اٹھا کر دیکھ لیں سب سے زیادہ ڈشیں گوشت کی ہی ملتی ہیں، ادرک گوشت، آلو گوشت، بھنڈی گوشت، کریلے گوشت، ٹینڈے گوشت، دو پیازہ گوشت، دال گوشت، بینگن گوشت، چنے گوشت وغیرہ وغیرہ حتٰی کہ گوشت گوشت کی ڈش بھی موجود ہے۔
کہا جاتا ہے کہ مغل شہشاہ اکبر اعظم اور شہزادہ سلیم کے دور کا باورچی گوشت کی اڑھائی ہزار مختلف ڈشیں پکا سکتا تھا۔
گوشت کی آلودگی کا یہ سفر ابھی ختم نہیں ہوا۔ آئے روز کوئی نہ کوئی نئی ڈش تیار ہوتی ہے اور انجام کار یہ ہوا کہ دن بدن امراض معدہ، اور دل کے مریضوں کی تعداد بڑھتی چلی جا رہی ہے۔ شوگر کنٹرول سے باہر ہوتی چلی جا رہی ہے، کولیسٹرول قابو میں نہیں آتا، بلڈ پریشر نے الگ ناک میں دم کر رکھا ہے، مستقل سر درد کی شکایت بڑھ گئی ہے، جگر خون پیدا کرنا بھولتا جا رہا ہے اور ہر چوتھا آدمی جوڑوں کے درد کا رونا روئے جاتا ہے۔ معدے کا السر اور بواسیر اس کے علاوہ ہیں۔ انسان کا یہ انجام صرف اس لئے ہوا ہے کہ یہ لذت اور چسکا بڑھانے کے چکر میں گوشت سے سارے وٹامنز اور غذائیت نچوڑے چلا جا رہا ہے۔ قدرت کی دی ہوئی نعمتوں میں اپنی فنکاری کرنے کا یہ انجام تو ہونا ہی تھا۔ آپ کسی بھی چیز کو آلودہ کر کے دیکھ لیں ان کا انجام برا ہی ہو گا۔ مثال کے طور پر بدلتے ہوئے موسموں کو لیجیئے یہ قدرت کا سب سے حسین اور انمول تحفہ ہے۔ گرمیوں میں ائیر کنڈیشنروں نے گرمی کو آلودہ کر دیا اور سردیوں میں ہیٹروں نے سردی کو آلودہ کر دیا۔ انٹرنلی ائیر کنڈیشنڈ یا انٹرنلی ہیٹیڈ دفاترمیں کام کرنے والے اور کنٹرول ٹمپریچر کی گاڑیوں میں سفر کرنے والے افراد کی قوت مدافعت ایک عام آدمی کے مقابلے میں پچاس فیصد کم ہوتی ہے۔
بات صرف کھانے پینے اور موسموں تک محدود رہتی تو کوئی بات نہیں تھی لیکن ہم نے تو بہت آگے بڑھ کر موسمی تہواروں کو بھی آلودہ کرنا شروع کر دیا ہے۔ کبھی شب برات پر رات بھر عبادت کی جاتی تھی اور موم بتیاں روشن کی جاتی تھیں لیکن آج آتش بازی کو ہی دعاؤں کی قبولیت کا ذریعہ بنا لیا گیا ہے۔ کبھی عید کو محمود و ایاز کا مٹانے کا تہوار سمجھا جاتا تھا لیکن آج عیدیں محض غریب طبقے کے لئے خود کشی اور خود سوزی کا تہوار بنتی جا رہی ہیں۔ عید میلاد النبی صلی اللہ علیہ وسلم کا تہوار انتہائی عقیدت و محبت کا تہوار ہے لیکن اس میں بھی جھمر اور دیگر لوازمات شامل کر کے اسے آلودہ کرنے کی کوشش کی جا رہی ہے۔ حضرت علی رضی اللہ عنہ کے یوم پیدائش پر ڈھول کی تھاپ پر جھمر مارتے اور ایک دوسرے پر نوٹ نچھاور کرتے ہوئے میں نے اپنی آنکھوں سے دیکھا ہے۔ خدارا آنے والی نسلوں کے لئے عقیدت، محبت اور احترام کے ان تہواروں کو تو اپنی اصل شکل میں رہنے دیں، انہیں تو آلودہ نہ کریں۔
کسانوں کے لئے جشن بہاراں کا تہوار تھا لیکن اس کی نسبت بسنت سے جوڑ کر اسے بھی آلودہ کر دیا گیا اور یہ ویلنٹائن ڈے تو کبھی ہمارے تہواروں میں شامل ہی نہ تھا۔
قارئین کرام! خود شکار کر کے کچا گوشت کھانے والے شیر کو صرف پانچ مرتبہ کسی فائیو سٹار ہوٹل کا “آلودہ“ یعنی روسٹ گوشت کھلا دیں تو وہ بلی بن جاتا ہے اور پھر عمر بھر کسی پر ہاتھ اٹھانے کے قابل نہیں رہتا۔ یہ ایام ویلنٹائن اور بسنت بھی آلودہ تہوار ہیں۔ ہم نے اگر اپنے تہواروں کی حفاظت نہ کی اور یہ آلودہ تہوار پانچ مرتبہ ہی منا لئے تو دنیا کی کوئی طاقت ہمیں بلی بننے سے روک نہیں سکے گی۔
لیکن ٹھہریے مجھے یہ بتائیے، کیا پہلے ہم شیر ہیں؟؟
جی نہیں ہم تو صرف امریکہ کے فرنٹ لائن اتحادی ہیں۔

مکمل تحریر اور تبصرے >>>

کیا ہم بے ایمان قوم ہیں؟

کیا ہم بے ایمان قوم ہیں؟

We are corrupt as a nation.

مکمل تحریر اور تبصرے >>>

آئی لو یو ماں

آئی لو یو ماں

ماں نے اپنے بچے کو ایک پل پار کراتے ہوئے کہا
“میرا ہاتھ مضبوطی سے پکڑ لو“
بچہ بولا  “نہیں ماں، آپ میرا ہاتھ پکڑ لیں“
ماں “اس میں کیا فرق ہے؟“
بچہ “اگر میں نے آپ کا ہاتھ پکڑا تو شاید میں مشکل میں آپ کا ہاتھ چھوڑ دونگا، لیکن اگر آپ نے میرا ہاتھ پکڑا تو مجھے یقین ہے کہ آپ میرا ہاتھ کسی بھی حالت میں نہیں چھوڑیں گی۔

آئی لو یو ماں
اللہ پاک سب کی ماؤں کو سلامت رکھے ۔ آمین

مکمل تحریر اور تبصرے >>>

مزدور ڈے

مزدور ڈے

اس شہر میں مزدور جیسا دربدر کوئی نہیں

جس نے سب کے گھر بنائے اس کا گھر کوئی نہیں

مکمل تحریر اور تبصرے >>>

میڈی جان عید مبارک

میڈی جان عید مبارک

دل مونجھیں توں آزاد ھووی

رھویں وسدا، جھوک آباد ھووی

اج شہر تیڈے وچ عید ھوسی

میڈی جان

عید مبارک

میڈا سوھنڑا اللہ

تہاکوں ہمیشہ ہسدا وسدا رکھے ۔۔۔ آمین

مکمل تحریر اور تبصرے >>>

مچھر کا خوف

مچھر کا خوف

جو لوگ دل میں اللہ کا خوف نہیں رکھتے، اللہ اُن کے دل میں اُس چیز کا خوف پیدا فرما دیتا ہے جسے انسان حقیر سے حقیر سمجھتا ہے۔

جیسا کہ

“مچھر“

آج انسان ایک مچھر کے ہاتھوں اتنا بےبس ہو چکا ہے کہ اپنے گھر میں بھی محفوظ نہیں۔

یہ وبا نہیں اللہ کا عذاب ہے

مگر ہم لوگ بجائے اس کے کہ اللہ سے اپنے گناہوں کی معافی مانگیں، سچے دل سے توبہ کریں، ہم اپنی ناقص عقلوں سے اس سے بچاؤ کے طریقے ڈھونڈ رہے ہیں۔

آج جتنا رش ہسپتالوں میں ہے اگر یہی رش مسجدوں میں آ جائے تو انشاءاللہ یہ عذاب اللہ کی رحمت سے ٹل جائے گا۔

اللہ ہم سب کو ہدایت عطا فرمائے ۔۔۔ آمین

مکمل تحریر اور تبصرے >>>

End of Love

End of Love

کسی نے ماں کے کندھے پر اپنا سر رکھ کر پوچھا:

"ماں" کب تک اپنے کندھے پے سونے دے گی؟

ماں نے ہنستے ہوئے کہا:

جب تک لوگ مجھے کندھوں پے نہ اٹھا لیں

مکمل تحریر اور تبصرے >>>

آج ناک کٹی ہے کل کو گردن کٹ جائے

آج ناک کٹی ہے کل کو گردن کٹ جائے

عام زندگی کے ساتھ چلنے کی کافی کوشش کی لیکن حکومتی دباؤ نے پریشانیوں اور مسائل میں ایسا اضافہ کیا کہ اب یہ بھی نہیں سوچتا کہ مجھے کوئی پچھتاوا ہوا ہے۔ بلکہ خوشی ہے اور چاہتا ہوں کہ آج ناک کٹی ہے کل کو گردن کٹ جائے کیونکہ پاکستان واپسی پر درپیش مسائل کی وجہ سے لگتا ہے کہ شاید ہم جیسے لوگ اسی کام کے لیے بنے ہیں اور کر بھی کیا سکتے ہیں۔‘

کہتے ہیں کہ اگر صبح کا بھولا شام کو گھر لوٹ آئے تو اسے بھولا نہیں کہتے۔ لیکن اٹھائیس سالہ محمد فاروق کی باتیں سن کر بظاہر ایسا محسوس ہوتا ہے کہ ان کے ساتھ الٹ ہوا۔

کراچی کے علاقے گلشن کی ایک کچی آبادی میں ایک کمرے پر مشتمل مکان کے انتہائی مختصر صحن میں بیٹھے محمد فاروق کا مسخ شدہ چہرہ جہاں ان کے تلخ ماضی کی عکاسی کر رہا تھا تو وہیں ان کی آنکھوں میں مایوسی بھی نمایاں تھی۔

محمد فاروق امریکہ میں نائن الیون حملوں سے پہلے ہی پاکستان میں شدت پسندانہ سوچ رکھنے والے عناصر کی جکڑ میں آ چکے تھے۔

انھوں نے کہا ’گلشن اقبال کے ایک مدرسے میں زیر تعلیم تھے تو جہاد کا شوق ہوا۔ اسی دوران طالبان کے ایک ساتھی سے ملاقات ہوئی۔ ان کے توسط سے پہلی بار سنہ انیس سو ننانوے میں سترہ سال کی عمر میں کابل گیا اور وہاں تقریباً سات ماہ تک قیام کے دوران عسکری تربیت حاصل کی اور اس کے بعد واپس پاکستان آ گیا۔‘

محمد فاروق کے مطابق نائن الیون حملوں کے فوری بعد افغانستان چلے گئے تھے تاکہ امریکی حملے کے خلاف مزاحمت کی جا سکے۔ تاہم جلد ہی نومبر دو ہزار ایک میں طالبان مخالف فورسز شمالی اتحاد کے نرغے میں آنے کے بعد اپنے دیگر ساتھیوں اور طالبان سمیت ہتھیار ڈالنے پر مجبور ہو گئے۔ بعد میں قلعہ جنگی جیل منتقل کر دیے گئے جہاں جیل میں طالبان کی بغاوت کے بعد امریکہ اور شمالی اتحاد کی کارروائی میں شدید زخمی ہو گئے۔

’جیل میں مسلسل سات سے آٹھ روز تک جاری رہنے والی کارروائی کے دوران میرے چہرے اور سر پر بم کے ٹکڑے لگنے سے گہرے زخم آئے۔ بعد میں کچھ عرصہ زخمی حالت میں کسی نامعلوم زیر زمین جگہ پر قید رکھا گیا اور اس دوران طبی امداد بھی فراہم کی جاتی رہی۔ بعد میں پاکستانی فوج نے ایک طیارے کے ذریعے ان سمیت ڈیڑھ سو کے قریب افراد جو تمام بیمار یا زخمی تھے کو پشاور منتقل کیا۔ پشاور جیل میں چار ماہ جیل میں رکھنے کے بعد رہا کر دیا گیا۔‘

محمد فاروق کے مطابق کراچی واپس پہنچنے پر ایک تو زخموں کی وجہ سے شدید پریشانی کا سامنا تھا کیونکہ جیل میں نہ ہونے کے برابر طبی علاج ہوا تھا اور دوسرا گزر بسر کرنے کے لیے جیب میں کچھ نہیں تھا۔

انھوں نے کہا’افغانستان جانے سے پہلے جس فیکڑی میں کام کرتا تھا اس کے مالک سے جان پہچان تھی۔ اسے مجبوری بتائی تو اس نے علاج کرانا شروع کر دیا۔ تاہم سکیورٹی اداروں نے ان کو یہ کہہ کر علاج بند کروا دیا کہ یہ دہشت گرد ہے اور کل کو اگر کسی جگہ دہشت گردی کی کوئی کارروائی کر دے تو کون ذمہ دار ہو گا۔‘

محمد فاروق کے مطابق علاج بند ہونے کے کچھ عرصے کے بعد بین الاقوامی امدادی ادارے عالمی ریڈ کراس نے رابط کیا کیونکہ انھوں نے افغانستان میں دوران قید میری تمام معلومات حاصل کیں تھیں اور میرا اعلاج شروع کروایا۔

’پانچ سال میں راولپنڈی کے فوجی ہسپتال میں میرے چہرے کی اٹھارہ بار سرجری ہو چکی ہیں لیکن اب انھوں نے بھی جواب دے دیا ہے کہ آپ کا مزید کچھ نہیں ہو سکتا۔‘

محمد فاروق کے مطابق ’ریڈ کراس والے بھی پیچھے ہٹ گئے کہ اس کا اب کچھ نہیں ہو سکتا ہے۔ اب صورتحال یہ ہے کہ میرے پاس مہنگے علاج کے لیے رقم نہیں ہے اور چہرہ خاص طور پر ناک کاعلاج نہ ہونے کی وجہ سے انفیکشن ہو چکا ہے اور سانس لینے میں مشکل کا سامنا ہے۔‘

’چہرے کی وجہ سے کوئی روز گار نہیں ملتا تھا، اگر ملتا تھا تو پولیس اہلکار تفتیش کے لیے پیچھے پہنچ جاتے تھے اور مالکان کو ماضی کا پتہ چلتا ہے تو ملازمت دینے سے انکار کر دیتے ہیں۔‘

محمد فاروق کے مطابق ملازمت کے حصول میں ناکامی کے بعد کچھ لوگوں کی امداد سے ایک چھوٹی سی دکان شروع کی لیکن اب اسے ایک عزیز کو پچاس ہزار روپے میں فروخت کر دیا ہے تاکہ کم از کم تھوڑا بہت علاج تو شروع کروایا جا سکے۔

انھوں نے بتایا کہ چہرے اور سر کے زخموں کا علاج کافی مہنگا ہے اور موجودہ صورتحال میں زندہ رہنے کے لیے رقم نہیں ہے تو ادویات خریدنے کے لیے رقم کہاں سے آئے گی۔

’کسی بھی دہشت گردی کے واقعے کے بعد پولیس والے گھر پہنچ جاتے ہیں کہ آپ تفتیش کے لیے فلاں جگہ پہنچ جائیں۔ مجھے سمجھ نہیں آتی ہے کہ یہ لوگ میرے سے کیا چاہتے ہیں۔ کیا میں نے ہمیشہ یہ ہی کام کرنا ہے۔ یا تو ہمیں جیل میں بند کر دیں یا تو مار دیں۔‘

محمد فاروق نے اپنے زخمی ناک کو ایک کپڑے کی مدد سے صاف کرتے ہوئے مایوسی کے عالم میں کہا کہ وہ چاہتے تھے کہ ان کا علاج ہو جائے، چہرہ ٹھیک ہو جائے اور وہ معاشرے میں ایک عام انسان کی طرح زندگی گزاریں۔ ’میرا ایک چھوٹا سا کاروبار یا ملازمت ہو اور ایک خاندان ہو، اس کے لیے میں نے کافی کوشش کی لیکن مجھے اب لگتا ہے کہ اب اس طرح کی زندگی گزارنے کی مزید کوشش نہیں کر سکتا ہوں۔‘

محمد فاروق نے ماضی میں کیے پر پچھتاوے کے بارے میں سوال پر کہا ’اصل میں مجھے اب کوئی پچھتاوا محسوس نہیں ہوتا ہے کیونکہ یہاں واپس آ کر میں نے کافی پریشانیوں کا سامنا کیا ہے۔ حکومت کے رویے اور اس کی جانب سے بار بار دباؤ ڈالنے اور یہاں تک کہ میرا علاج بند کروا دیا۔ تو اس صورت میں مجھے ان سے کیا ڈرنا ہے۔ یہاں بھی گھٹ گھٹ کر مر رہا ہوں تو وہاں بھی (لڑائی کرتے ہوئے) مرنا ہی ہے تو مجھے اس پر خوشی ہے کہ میرا ناک کٹا ہے کل کو گردن کٹ جائے۔ شاید ہم لوگ بنے ہی اس کام کے لیے ہیں۔‘

محمد فاروق کی مجبوری اور بے بسی دیکھ کر اندازہ کیا جا سکتا ہے کہ وہ کس کرب سے گزر رہیں ہیں۔ ضرورت اس بات کی ہے کہ اگر کوئی اپنے ماضی کو بھلا کر ایک بہتر مستقبل کی جانب بڑھنا چاہتا ہو تو اس کی ہمت بندھانی چاہیے نہ کہ مشکلات میں اضافے سے اس کو اسی مقام پر دوبارہ لا کھڑا کیا جائے جہاں سے اس نے شدت پسندی کی جانب سفر شروع کیا تھا۔ ذیشان ظفر بی بی سی اردو ڈاٹ کام، کراچی

مکمل تحریر اور تبصرے >>>

عید مبارک

عید مبارک

اسلام علیکم!

میری طرف سے تمام عالم اسلام کو عید کی خوشیاں مبارک ہوں۔

مکمل تحریر اور تبصرے >>>

Female Co-worker accused Aurat Foundation Official for Sexual Harassment

Female Co-worker accused Aurat Foundation Official for Sexual Harassment

خواتین کے حقوق کے نام نہاد مرد محافظوں کا اپنے ہی ادارے کی ایک خاتون کو جنسی ہراساں کیے جانے کا انکشاف، متاثرہ خاتون نے عورت فاؤنڈیشن کی مرد انتظامیہ کے خلاف تحریری شکایت جمع کرا دی، مرد سی او او کی جانب سے پولیس ایف آئی آر کٹوانے سے باز رکھنے کیلئے ملزم کی عارضی معطلی کا ڈھونگ اور پراسرار تحقیقاتی کمیٹی کا قیام۔ انسانی حقوق اتحاد کا واقعے سے لاعلمی کا اظہار۔

 تحفظِ حقوقِ نسواں کی مشہورِ زمانہ تنظیم عورت فاؤنڈیشن جسکا سارا زور اسی بات پر ہوتا ہے کہ کسی طرح اسکو کوئی ایسا خواتین سے متعلق جھوٹا سچا کیس مل جائے جس کو اچھالنے سے پاکستان کو بدنام کیا جا سکے اور بدلے میں غیرملکی امداد کھری کی جائے، کے بارے میں حال ہی میں ایک ایسے شرمناک واقعے کا انکشاف ہوا ہے جس سے اس ادارے کا منافقانہ کردار مزید نکِھر کر بے نقاب ہوتا ہے۔

عورت فاؤنڈیشن کے اسلام آباد آفس میں دو ماہ قبل بھرتی ہونے والی خاتون نے اپنی تحریری شکایت میں اپنے باس عاصم خٹک پر مبینہ طور پر جنسی ہراساں کیے جانے کا الزام عاید کیا ہے۔ مقامی اخبار میں چھپنے والی رپورٹ کے مطابق عورت فاؤنڈیشن کا نیشنل کوآرڈینیٹر عاصم خٹک اپنی جونئیرخاتون کولیگ کو دفتری اوقات کے بعد بھی دفتر میں دیر تک رکنے پر مجبور کرتا تھا اور اس دوران جارحانہ انداز میں اظہارِ عشق کرنے کی کوشش کی گئی اور ناکامی پر متاثرہ خاتون کا منہ بند رکھنے ہر قسم کا حربہ آزمایا گیا جس میں ایموشنل بلیک میلنگ کرتے ہوئے خودکشی کی دھمکی تک شامل تھی۔ عورت فاؤنڈیشن کی مرد انتظامیہ نے خاتون کو آفیشل میٹنگ کا جھانسہ دے کر زبردستی ایک ریسٹورنٹ میں بھی بلایا جس پرخاتون کے سخت احتجاج ریکارڈ کیے جانے کی اطلاعات ہیں۔ واضح رہے کہ عورت فاؤنڈیشن کا عاصم خٹک اپنے آپ کو اے این پی کے راہنما اجمل خٹک کا رشتہ دار ظاہرکرتا ہے۔

اِس سارے وقوع میں عورت فاؤنڈیشن کے مرد سی او او نعیم مرزا کی اپنے پیٹی بھائی کو بچانے کیلئے کوششیں قابلِ دید ہیں جس نے متاثرہ خاتون کو پولیس میں ایف آئی آر کٹوانے سے باز رکھنے کیلئے عاصم خٹک کی عارضی معطلی کا نہ صرف ڈھونگ رچایا بلکہ ایک ایسی پراسرارتحقیقاتی کمیٹی بھی تشکیل دے ڈالی جسکے ارکان کا کسی کو علم ہی نہیں۔ اس سلسلے میں جب انسانی حقوق اتحاد جو کہ مختاراں مائی کیس میں میڈیا اور اعلی عدلیہ کے خلاف زہر اگلتا رہا، سے رابطہ کرکے حقائق جاننے کی کوشش کی گئی تو انکی جانب سے مکمل طور پر لاعلمی کا اظہار کیا گیا۔ شاید وہ اس بات کا انتظار کر رہے ہیں کہ میڈیا ہی انکو "چراغ تلے اندھیرا" دکھائے اور عدلیہ سوموٹو ایکشن لیکر

انہیں باخبر کرے۔

دیکھنا اب یہ ہے کہ عورت فاؤنڈیشن اور انسانی حقوق اتحاد جو کے دور دراز علاقوں کی خواتین کو اپنے مزموم مقاصد میں استعمال کرنے میں خاصی مہارت رکھتا ہے وہ اپنے ہی ادارے میں کیے جانے والے بیہیمانہ واقعے سے کیسے نمٹتا ہے۔ آیا سیاسی اثر و رسوخ رکھنے والے ملزم کو حوالہ پولیس کرکے آزادانہ تحقیقات کراکر ایک اچھی مثال قائم کی جائے گی یا نعیم مرزا کی تشکیل شدہ تحقیقاتی کمیٹی کے ذریعے متاثرہ خاتون کو جھوٹا ثابت کرکے کیس کو رفع دفع کیا جائے گا۔ یہ تو وقت ہی بتائے گا لیکن مختاراں مائی، حلیمہ بھٹو اور اب اپنے ہی ادارے کی خاتون پر مجرمانہ حملے کی خبریں یہ سوچنے پر مجبور کر دیتی ہیں کہ شاید عورت اس ظالم مرد معاشرے میں تو بچ جائے لیکن عورت فاؤنڈیشن میں نہیں۔

مکمل تحریر اور تبصرے >>>

تجربہ تو کرنے دیجیئے

تجربہ تو کرنے دیجیئے

اعلٰی تعلیم میں نمایاں پوزیشن حاصل کرنے والے ایک نوجوان نے ملک کی ایک بڑی نامور کمپنی میں ادارتی منصب کیلئے درخواست جمع کرائی اور اُسے ابتدائی طور پر اِس منصب کیلئے موزوں اُمیدوار قرار دیکر فائنل انٹرویو کیلیئے تاریخ دیدی گئی۔

انٹرویو والے دن کمپنی کے مُدیر (کمپنی کا سربراہ) نے نوجوان کی پروفائل کو غور سے دیکھا اور پڑھا، نوجوان اپنی ابتدائی تعلیم سے لے کر آخری مرحلے تک نا صرف کامیاب ہوتا رہا تھا بلکہ اپنے تعلیمی اداروں میں ہمیشہ نمایاں پوزیشن حاصل کرتا رہا تھا۔ اُسکی تعلیم کا یہ معیار آخر تک برقرار رہا تھا۔ مُدیر نے جوان سے پوچھا: تعلیم کے معاملے میں تمہیں کبھی کوئی مشکل یا کوئی ناکامی بھی پیش آئی، جسکا جواب نوجوان نے کبھی نہیں کہہ کر دیا۔

مُدیر نے پوچھا: یقینا یہ تمہارے والد ہونگے جنہوں نے تمہاری اِس مہنگی تعلیم کے اخراجات برداشت کیئے ہونگے؟

نوجوان نے کہا نہیں، میرے والد کا تو اُس وقت ہی انتقال ہو گیا تھا جب میں ابھی اپنی پہلی جماعت میں تھا۔ میرے تعلیم کے سارے اخراجات میری امی نے اُٹھائے ہیں۔

مُدیر نے پھر کہا؛ اچھا، تو پھر تمہاری امی کیا جاب کرتی ہیں ؟

نوجوان نے بتایا کہ میری امی لوگوں کے کپڑے دھوتی ہیں۔

مُدیر نے نوجوان سے کہا کہ مجھے اپنے ہاتھ تو دِکھاؤ۔ نوجوان نے ہاتھ اُسے تھمائے جو کہ اِنتہائی نرم و نازک اور نفیس تھے، ہاتھوں کی نزاکت سے تو شائبہ تک نہیں ہوتا تھا کہ نوجوان نے تعلیم کے علاوہ کبھی کوئی اور کام بھی کیا ہوگا۔

مُدیر نے نوجوان سے پوچھا: کیا تم نے کپڑے دھونے میں کبھی اپنی امی کے ہاتھ بٹائے ہیں؟

نوجوان نے انکار میں جواب دیتے ہوئے کہا: نہیں، کبھی نہیں، میری امی ہمیشہ مجھے اپنا سبق یاد کرنے کو کہا کرتی تھیں، اُنکا کہنا تھا کہ کپڑے وہ خود دھو لیں گی۔ میں زیادہ سے زیادہ کُتب کا مطالعہ کرتا تھا، اور پھر میری امی جتنی تیزی اور پُھرتی سے کپڑے دھوتی تھیں میں تو اُتنی تیزی سے دھو بھی نہیں سکتا تھا۔

مُدیر نے نوجوان سے کہا؛ برخوردار، میری ایک شرط ہے کہ تم آج گھر جا کر اپنی امی کے ہاتھ دھوؤ اور کل دوبارہ میرے پاس واپس آؤ تو میں طے کرونگا کہ تمہیں کام پر رکھا جائے کہ نہیں۔

نوجوان کو یہ شرط کُچھ عجیب تو ضرور لگی مگر کام ملنے کے اطمئنان اور خوشی نے اُسے جلد سے جلد گھر جانے پر مجبور کردیا۔

گھر جا کر نوجوان نے اپنی ماں کو سارا قصہ کہہ سُنایا اور ساتھ ہی اُسے جلدی سے ہاتھ دھلوانے کو کہا۔ آخر نوکری کا ملنا اس شرط سے جُڑا ہوا تھا۔

نوجوان کی ماں نے خوشی تو محسوس کی، مگر ساتھ ہی اُسے یہ شرط عجیب بھی لگ رہی تھی۔ ذہن میں طرح طرح کے وسوسے اور خیالات آ رہے تھے کہ آخر نوکری کیلئے یہ کِس قسم کی شرط تھی؟ مگر اِس سب کے باوجود اُس نے اپنے ہاتھ بیٹے کی طرف بڑھا دیئے۔

نوجوان نے آہستگی سے ماں کے ہاتھ دھونا شروع کیئے، کرخت ہاتھ صاف بتا رہے تھے کہ اِنہوں نے بہت مشقت کی تھی۔ نوجوان کی آنکھو سے آنسو رواں ہو گئے۔ آج پہلی بار اُسے اپنی ماں کے ہاتھوں سے اُس طویل محنت کا ندازہ ہو رہا تھا جو اُس نے اپنےاِس بیٹے کی تعلیم اور بہتر مُستقبل کیلئے کی تھی۔

ہاتھ انتہائی کُھردے تو تھے ہی اور ساتھ ہی بہت سی گانٹھیں بھی پڑی ہوئی تھیں۔ آج نوجوان کو پہلی بار محسوس ہو رہا تھا کہ یہ کھردرا پن اگر اُسکی تعلیم کی قیمت چُکاتے چُکاتے ہوا تھا تو گانٹھیں اُسکی ڈگریوں کی قیمت کے طور پر پڑی تھیں۔ نوجوان ہاتھ دھونے سے فراغت پا کر خاموش سے اُٹھا اور ماں کے رکھے ہوئے باقی کپڑے دھونے لگ گیا۔ وہ رات اُس نے ماں کے ساتھ باتیں کرتے گُزاری، تھوڑے سے کپڑے دھونے سے اُسکا جسم تھکن سے شل ہو گیا تھا۔ سارا سارا دن بغیر کوئی شکوہ زبان پر لائے کپڑے دھونے والی ماں سے باتیں کرنا آج اُسے بہت اچھا لگ رہا تھا، دِل تھا کہ کسی طرح بھی باتوں سے بھر نہیں پا رہا تھا۔

دوسرے دِن اُٹھ کر نوجوان دوبارہ اُس کمپنی کے دفتر گیا، مُدیر نے اُسے اپنے کمرے میں ہی بُلا لیا۔ نوجوان کے چہرے سے اگر جگ راتے کی جھلک نُمایاں تھی تو آنکھوں میں تیرتی ہوئی نمی کسی ندامت اور افسردگی کی کہانی سُنا رہی تھی۔

مُدیر نے نوجوان سے پوچھا، کل گھر جا کر تُم نے کیا کیا تھا؟

نوجوان نے مختصرا کہا کہ کل میں نے گھر جا کر اپنی امی کے ہاتھ دھوئے تھے اور پھر اُس کے باقی بچے ہوئے کپڑے بھی دھوئے تھے۔

مُدیر نے کہا میں تمہارے محسوسات کو پوری سچائی اور دیانتداری کے ساتھ سُننا چاہتا ہوں۔

نوجوان نے کہا: کل مُجھے لفظ قُربانی کے حقیقی معانی معلوم ہوئے۔ اگر میری امی اور اُسکی قُربانیاں ناں ہوتیں تو میں آج اِس تعلیمی مقام پر ہرگز فائز نہ ہوتا۔ دوسرا میں نے وہی کام کر کے اپنے اندر اُس سخت اور کٹھن محنت کی قدر و قیمت کا احساس پیدا کیا جو میری ماں کرتی رہی تھی اور مُجھے حقیقت میں اُسکی محنت اور مشقت کی قدر کا اندازہ ہوا۔ تیسرا مُجھے خاندان کی افادیت اور قدر کا علم ہوا۔

مُدیر نے نوجوان کو بتایا کہ وہ اپنی کمپنی میں موجود ادارتی منصب کیلئے ایک ایسے شخص کی تلاش تھا جو دوسروں کی مدد کا جذبہ رکھنے والا ہو، دوسرے کا اِحساس کرنے والا ہو اور صرف مال کا حصول ہی اُسکا مطمعِ نظر نہ ہو۔ نوجوان تمہیں مبارک ہو، میں تمہیں اِس منصب کیلئے منتخب کرتا ہوں۔

اور کہتے ہیں کہ نوجوان نے اُس کمپنی میں بہت محنت، لگن اور جذبے کے ساتھ کام کیا، دوسروں کی محنت کی قدر اور احساس کرتا تھا، سب کو ساتھ لیکر چلنا اور سارے کام مِل جُل کر ایک فریق کی حیثیت سے انجام دینا اُسکا وطیرہ تھا، اور پِھر اُس کمپنی نے بھی بہت ترقی کی۔

اِس کہانی سے اخذ کیئے گئے کُچھ نتائج ملاحظہ فرمائیے:

جِس بچے کو مُحبت اور شفقت کے علاوہ اُسکے منہ سے نکلنے والی ہر خواہش کی فوری تعمیل کے ماحول میں پرورش کی جائے وہ بچہ ہر چیز پر حقِ ملکیت محسوس کرتا ہے اور ہمیشہ اپنی خواہشات اور اپنی ذات کو مقدم رکھتا ہے۔

ایسا بچہ اپنے باپ کی محنت اور مشقت سے بے خبر رہتا ہے، جب عملی زندگی میں قدم رکھتا ہے تو ہر کسی سے توقع رکھتا ہے کہ وہ اُسکا ماتحت اور تابع فرمان ہو۔

ایسا بچہ عملی زندگی میں کسی ادارتی منصب یا ذمہ داری پر فائز ہو جائے تو اپنے ماتحتوں کا دُکھ درد اور تکلیفوں کو سمجھتا ہی نہیں اُلٹا کسی قسم کی ناکامی کی صورت میں اپنی ذمہ داری دوسروں پر ڈالتا ہے۔

دوسروں کو حقارت اور کمتر سمجھنا تو معمولی بات ہے ایسا بچہ اپنے مفادات اور کامیابیوں کیلئے دوسروں کو راستے سے ہٹانا معمولی بات سمجھتا ہے۔

دیکھ لیجیئے اگر ہم اپنی اولاد کی تربیت اِسی انداز سے کر رہے ہیں تو ہمارے کیا مقاصد ہیں؟ ہم اُنکی حفاظت کر رہے ہیں یا اُن کی بربادی کے اسباب پیدا کر رہے ہیں؟

ہو سکتا ہے آپکا بچہ ایک بڑے گھر میں رہتا ہو، انواع و اقسام کے اعلٰی کھانے کھاتا ہو، پیانو کی تعلیم حاصل کرتا ہو، کسی پروجیکٹر یا بڑی سکرین والے ٹیلیویژن پر اپنے پسندیدہ پروگرام دیکھتا ہو، لیکن اگر کبھی وہ گھر کے لان کی گھاس کاٹنا چاہے تو اُسے اِس کام کا تجربہ تو کرنے دیجیئے۔

اگر وہ کھانا کھا چُکے تو اُسے بہنوں کے ساتھ یا ماں کے ساتھ باورچی خانے میں جا کر اپنی پلیٹ بھی دھونے دیجیئے۔

اِسکا یہ مطلب ہرگز نہیں بنے گا کہ آپکے پاس گھر میں خادمہ رکھنے کی حیثیت نہیں ہے، بلکہ اِسکا یہ مطلب بنے گا کہ آپ اپنے بچے سے صحیح اُصولوں کے مطابق محبت کرتے ہیں۔

کیونکہ آپ چاہتے ہیں کہ آپکے بچے کے اندر اِس بات کا شعور اور احساس پیدا ہو کہ اُس کے باپ نے اُس کیلئے جو دولت چھوڑ کر جانی ہے وہ آسانی سے نہیں کمائی گئی تھی جس طرح مذکورہ بالا کہانی میں نوجوان کی ماں کی محنت و مشقت والی کمائی کا ذکر ہے۔

اِن سب باتوں سے قطع نظر، آپ اپنے بچے کو ایثار اور قُربانی کا مفہوم سمجھانا چاہتے ہیں، آپ اُسے کام کی تکلیف اور مصائب و مشاکل سے آگاہ کرنا چاہتے ہیں۔

آپ اُسے بتانا چاہتے ہیں کہ دوسروں کی محنت و مشقت کی قدر اور احساس کیا جائے تاکہ نتائج سے سب مل کر لطف اُٹھا سکیں۔

حسبِ سابق یہ مضمون بھی عربی سے اردو میں ترجمہ کرکے آپکی خدمت میں پیش کیا ہے، آپکی دعاؤں کا طالب ہوں ۔ محمد سلیم (شانتو۔چائنا)

مکمل تحریر اور تبصرے >>>

کِھلتے دِل، کُھلتے خیال

کِھلتے دِل، کُھلتے خیال

محبت اِک حسین شے ہے مگر ہم اُسے نہیں جانتے

حسن کی تلاش فہم سے ہے مگر ہم اُسے نہیں مانتے

ہم اِس دُنیا میں آتے ہیں۔ زندگی میں سیکھتے ہیں اور پھر حاصل علم دوسروں کو سِکھا کر حقیقی راہ پر دُنیا سے کنار ہ کشی فرماتے ہیں۔ایسے ہی ہم ہر برس کچھ نیا جاننے کی کوشش میں بہت کچھ اپناتے ہیں۔ آہستہ آہستہ ہم اپنا علم نئی نسل کو منتقل کرتے ہیں۔ زندگی میں ہم جو کچھ پاتے ہیں۔اُس کو بالآخر بانٹ کر جانا ہے، ورنہ ہمارے بعد ورثہ بٹ جاتا ہے۔ ہر وُہ شےءجس کی فطرت بانٹنا ہے، وُہ ہمیں زندگی کی حقیقت کی طرف لیجاتی ہے۔ علم بانٹو، محبت بانٹو، خوشی بانٹو، یہی حقیقی دولت ہے، بانٹو اور بڑھاؤ۔

انسان عمر بھر حسن کی تلاش میں رہتا ہے۔ حسن کیا ہے؟ ہر انسان کا اپنا اِک معیار ہے۔ اطمینانِ قلب اگر حسن ہے تو تسکینِ ذہن لطفِ افکار ہے۔ نگاہئِ حسن جس کو ملی، اُسکی دُنیا ہی بدلی۔ حسن ذات سے باہر ہے، کسی شےءکی مرکوزیت میں حسن تو ہو سکتا ہے، ممکن ہے وُہ آپ کا قلبی لگاؤ ہو۔ قلبی واردات تو آپ کو ذات سے باہر لاتی ہے اور کسی اور ذات کی طرف لیجاتی ہے اور مخلوق خدا سے محبت کرنا سکھاتی ہے۔ خلقِ خداکی محبت آپ کو اللہ کی محبت کا رستہ دکھلاتی ہے۔ اللہ سے محبت کا رشتہ جب جڑ جائے تو خوف خوف نہیں رہتے بلکہ محبت بنتے ہیں۔

حسن کا تصور ملنا خدا کی بہت بڑی دَین ہے۔ زندگی کی حقیقت میں خوبصورت رنگ انسان کے دِلکش رویے اور خیالات ہیں جو اَمن اور سکون قائم رکھتے ہیں۔

انسان اپنی زندگی آئیڈئیل تھیوری یا ماڈل کے تحت گزارنا چاہتا ہے۔ ہمارے فلسفہ زندگی کی سب سے بڑی خامی یہ ہے کہ ہم خامی کا خانہ اپنی تھیوری میں نہیں رکھتے۔ اپنے پیش کردہ ماڈل میں اگر حقیقی رنگ بھر دیں تو زندگی کو زندگی کے سبق سے سیکھا جاسکتا ہے۔

ہم تنقیدی نگاہیں رکھتے ہیں، حالات کی بہتری حوصلہ اور رہنمائی سے ہوتی ہے۔ ہم زندگی کو بڑے ہی محدود کینوس سے دیکھتے ہیں۔ انسانی چہرہ پر موجود تاثرات کو نہیں سمجھتے۔ شک کی نگاہ سے دوسروں کو دیکھتے ہیں۔ مگر غیر جانبدار ہو کر شک دور نہیں کرتے ۔

اکثر لوگ خود کو سیکولر کہتے ہیں۔ افسوس! میرا معاشرہ دو متضاد انتہاپرست گرہوں کی ضد کی شدت کے باعث بَٹ رہا ہے۔ کون جانے! سیکولر بننے کے لیے خود کو پہلے صوفی بنناہوتا ہے۔ لفظ صوف سے مراد کسی کے متعلق بغض ، حسد، کینہ اور نفرت دِل میں نہ رکھنا۔ اپنی مرضی مار دینا، اپنوں کی مرضی چھوڑ دینا اور حق بات کا بلا تعصب فیصلہ کرنا۔ اصل میں صوف ہے۔

ہمارے رویے اس لیے بھی بگڑتے ہیں ہم چھوٹے دِل رکھتے ہیں اور بند نگاہوں کی طرح تنگ ذہنوں میں اُلجھے رہتے ہیں۔

انسانی فطرت ہے کہ وُہ خواہشات رکھتا ہے، ایسے ہی خواہشات کی تکمیل غلطیوں کا مرتکب بناتی ہے۔ فطری خواہشات انسان کی معصوم خواہشات ہوتی ہے۔ ایسے ہی فطرتی غلطیاں معصوم انسانی غلطیاں ہوتی ہے۔ معصوم غلطیوں کو درگزر کریں بوقت ضرورت مصنوعی سرزنش سے غلطی کا احساس ضرور دلائیںمگر دِل کی میل صاف رکھیں۔ دِل بڑھنے لگے گا۔ برداشت آجائے گی۔

زندگی کو اپنے نقطہ نظر سے دیکھے مگر حالات کو دوسروں کی نگاہ سے دیکھے۔ ہم اختلافی مسائل کے بارے میں ایک رائے رکھتے ہیں۔ جن کے بارے میں آپ مخصوص سوچ (نفرت)رکھتے ہیں۔ اُن سے اُنکے خیالات بھی تو جانئے۔ تعصب سے پاک غیر جانبدارانہ سوچ ذہن کھولتی ہے۔ بڑھتے دِل، کُھلتے ذہن؛ بصیرت پاتے ہیں۔

گزشتہ برس میرے لفظوں نے اشعار کا روپ دھارا

نہیں جانتا ، کس کی دُعا سے میرا خیال خوب بڑھا

قیادت کو بصیرت کو چاہیے۔ خیالات ذاتیات میں محو ہو جائیں تو خیالات کا محور بصیرت سے محروم ہوتا ہے۔ قیادت حالات کے بھنور میں دھنستی رہتی ہے۔

حسن زندگی کو توازن دیتا ہے۔ زندگی گزارنا کوئی آئیڈئیل تھیوری نہیں۔ دوسروں کو سمجھ کر ردعمل یوں دینا کہ معاملات سلجھ جائیں۔ خوبی کو خامی کے ساتھ قبول کرنا، حسنِ سلوک ہے۔ دوست ہماری مرضی کے مطابق نہیں ہوتے۔ ہم اُن کو خامیوں سمیت قبول کرتے ہیں۔ اُنکی خامی ہمارے لیے خامی نہیں رہتی۔

حسن الجبرا کی ایک ایسی مساوات ہے، جس کو ہم مساوی رکھتے ہیں۔ مصور تصویر میں متوازن رنگ بھرتا ہے، شاعر شعر کا وزن مدنظر رکھتاہے، مصنف جملوں میں تواز ن لاتا ہے، گلوگار آواز کے اُتار چڑھاؤ میں توازن رکھتا ہے، متواز ن غذا صحت لاتی ہے، متوازن گفتگو سوچ کو نکھارتی ہے، متوازن عمل شخصیت بناتے ہیں۔ انسان کا حسن عمل اور سوچ کا توازن ہے تو انسانی شخصیت خوبیوں اور خامیوں کا مرقع ہے۔ ایسے ہی معاشرتی مساوات معاشرے کا حسن ہے۔

اپنی زندگی کی نئی بہار کے موقع پر گزشتہ برس کی وُہ نئی نگاہ پیش کی۔ جو مجھ کو سلطان شہاب الدین غوری سے عقیدت مندانہ ملاقات کے دوران ملی۔

لوگ اُنکے مرقد کو صرف ایک مقبرہ سمجھتے ہیں۔

راہ ِ عقیدت میں جو نگاہ ملی، ہم اُس کومزار مانتے ہیں۔

یا اللہ آج میری زندگی کا نیا برس شروع ہوچکا ہے، ہم سب پر اپنا کرم فرمانا۔ نئی راہوں کے نئے دروازے کھولنا۔ ہمارے خیالات میں حسن کی نگاہ اور محبت کا جذبہ برقرار رکھنا۔ ہماری راہ منزل میں اپنی رہنمائی جاری رکھنا۔ ہم سب کو اعلیٰ اخلاق کا نمونہ بنانا۔ آپ سب کو کل سے شروع ہونے والا نیاعیسوی سال نیک تمناؤں اور دُعا کے ساتھ مبارک ہو۔
(2010 دسمبر 31) فرخ نور بتاریخ

نوٹ:
میرے لیے آپ سب دُعائے خیر فرمائیے گا۔ زندگی رہی تو اپریل میں نئی تحریر پر ہماری ملاقات ہوگی۔ گزشتہ پانچ برسوں میں پہلا موقع ہوگا کہ آپ کو نئے سال کا پہلا آرٹیکل 5 یا 6 جنوری کو نہیں ملے گا۔میرے امتحانات ہے، آپ سب دُعا کرنا۔
اس برس میں نے اپنے تمام جاننے والوں کو اُنکی تاریخ پیدائش کے مواقع پر دُعاؤں کے پیغامات بھیجے۔ مگر سات فیصد افراد کی تاریخ پیدائش کا مجھے علم ہی نہ تھا۔ لہذا میں اُن سے معذرت خواہ ہوں کہ اُن کو ای میل نہ کرسکا۔ ایسے ہی جن افراد کو عید کے مواقع پر ایس ایم ایس ملے ، اُن کے ساتھ خوشی کا جذبہ بانٹا۔

مکمل تحریر اور تبصرے >>>

پاکستان کا نیا سیاسی کلچر

پاکستان کا نیا سیاسی کلچر

مکمل تحریر اور تبصرے >>>

عيد الاضحٰى مبارک

عيد الاضحٰى مبارک

عيد الاضحٰى یاد دلاتی ہے بہت سے مقدس لمحات
ایسے لمحات جن میں کی گئی فرمانبرداری اور دی گئی قربانی امر ہو گئی۔
حضرت ابراہیم علیہ السلام اور حضرت اسمائیل علیہ السلام کی فرمانبرداری۔

ان دو معزز و معتبر ہستیوں کا بہت بڑا احسان ہے ہم سب پر اور وہ ہے بیت اللہ شریف کی بنیادیں اٹھاتے ہوئے اللہ کے گھر کی تعمیر مبارک کے وقت میں آپ دونوں کی مانگی ہوئی بہت خوبصورت دُعا۔

“ہمارے رب! ان میں (ہماری نسل میں) ان میں سے ہی ایک رسول بھیج جو انہیں تیری آیتیں سنائے، انہیں کتاب اور حکمت کی تعلیم دے اور انہیں پاکیزہ بنائے۔“ سورہ البقرہ آیت١٢٩

اور تمام تعیف اس پاک پروردگار کے لئے جس نے اپنے ان پاکیزہ نبیوں کی دُعا کو قبول فرماتے ہوئے اپنے بندوں پر احسان عظیم فرمایا۔

“ہم نے تم میں سے ہی تم میں ایک رسول بھیجا جو تمہیں ہماری آیتیں سناتا ہے، تمہیں پاک کرتا ہے، تمہیں کتاب و حکمت کی تعلیم دیتا ہے اور تمہیں وہ باتیں سکھاتا ہے جو تم جانتے نہ تھے“ سورہ البقرہ آیت١٨١

یہ احساس بہت خوبصورت و معطر ہے کہ ہمیں اس پاک نبی صلی اللہ علیہ وسلم کے امتی ہونے کا شرف حاصل ہے
جن صلی اللہ علیہ وسلم کے دربار میں ہر پل ہزراہا فرشتے حاضر رہتے ہیں۔
جن صلی اللہ علیہ وسلم کے قدم مبارک ایک بار محسوس کرنے کے بعد آسمان بھی دوبارہ آپ صلی اللہ علیہ وسلم کا منتظر رہا۔
جس صلی اللہ علیہ وسلم ذات مبارک پر فرشتے درود پاک پڑھتے ہیں۔
جس صلی اللہ علیہ وسلم ذات مبارک کے لئے چرند پرند، انسان سب درود پاک پڑھتے ہیں۔
اور خدائے بزرگ و برتر اپنی مخلوق کے ساتھ خود آپ، آپ صلی اللہ علیہ وسلم پر درود بھیجتا ہے۔

عید کے اس مبارک موقع پر اللہ سے دعا ہے کہ
وہ ہمیں شعور عطا فرمائے کہ کسی بھی گلہ و ناشکری سے پہلے ہم سوچ لیں کہ کیا آپ صلی اللہ علیہ وسلم کی تشریف آوری کے احسان عظیم کا شکر ادا کر لیا ہے!!!

تمام مسلمانوں کو عيد الاضحٰى مبارک ہو

مکمل تحریر اور تبصرے >>>

دُنیا میں اَمن

دُنیا میں اَمن

بقول خواجہ دل محمد دل

شبنم لٹا رہی ہے پھُولوں میں بھر کے موتی۔
بِکھرے ہیں کیا چمن میں ہر سُو سحر کے موتی۔
اٹھکھیلیوں سے تیری بادِ صبا یہ ڈر ہے۔
مٹی میں مل نہ جائیں سب برگِ تر کے موتی۔

امن کی تلاش میں کوئی ہماری امان میں نہیں۔ ایمان تو ہیں مگرمَن سکون میں نہیں۔دُنیا کی ہر تعلیم انسان کے مَن میں اَ من کے گُلشن کھلاتی ہے۔بہار میںکھلتے پھولوں کی خوشبو، چمن کوخوب مہکاتی ہے۔

مسائل کو حل کرنے کے لیے طویل مباحث کی ضرورت نہیں۔ اگردرکار ہے تو صرف ایک نکتہ کی پہچان محبت،کدورت نہیں۔جیسے کل زندگی ایک ہی نقطہ پر گھوم کرآغاز و اختتام ہوئی۔کلمہ توحیدکے نکتہ ئِ تسلیم سے زندگی میں راہ سلیم آئی۔جس سے انسان کی انفرادی زندگی کے ساتھ ساتھ اجتماعی زندگی بھی حسین ہوئی ۔جس روز ہم رضا ئے الہی کے تابع ہوئے، اُسی لمحہ زندگی اُلجھنوں سے نکل کر سلجھن بن گئی۔بقول خواجہ میر درد:

شادی کی اور غم کی ہے دُنیا میں ایک شکل
گل کو شگفتہ دِل کہو تم یا شکستہ دِل

آج اس دُنیا میں سکون و امن کیوں نہیں؟ تعلیم بہت ہے مگر رویوں میں بد امنی کیوںہیں؟ کہیںمعاش کی فکر نے ہمیں اُلجھا یا ،کبھی تعیش کی تمنا میںمضطرب مزاج بنایا۔ عجب بات ہے تمام مذاہب اخلاقیات کی تعلیم دیتے ہیں۔ مگر ہمارے رویے اخلاقیا ت سے عاری کیوںٹھہرتے ہیں؟ معاشروں میں رعونت پروان چڑھ چکی، مسلکی اختلاف پر مسائل کیوں؟ عبادت گاہوں میں نفرت کی اُٹھان اُٹھی۔ محبت نفرت میں کیسے ڈھلی؟ مفاد نے رنگت کچھ یوں بدلی۔دُنیا میں بکھیڑے دوسروں میں اپنے واسطے پیدا کیے۔

کچھ عاقل فرماتے ہیں، اپنے اندر امن پیدا کیجیے، دُنیا میں سکون دیکھ لیجیے۔ انسان کی ذات میں امن مذہب کی اخلاقی تعلیم اُبھارتی ہے۔انسانی شخصیت کی مرصع سازی مثبت تہذیبی سوچ، تربیت اور رویوں سے بنتی ہے۔جو معاشرہ کو رواداری،برداشت،محبت اور صداقت کا مرقع بنا کر اُجاگر کرتی ہے۔

  تعلیم صرف کسی سکول میں حاصل کرلینے کا نام نہیں۔ خاندانی ماحول سے معاشرتی ماحول میں جو رویے ہم پر اثر انداز ہوتے ہیں۔ وُہ ہماری سوچ اور اذہانی کیفیات پر مسلسل منفی و مثبت تبدیلی پیدا کر تے ہیں۔آج میں جس معاشرہ میں رہتا ہوں۔ وُہ دولت کمانے سے جڑا ہے۔ تعلیم انسان اپنے آپ کو بنانے اور بدلنے کے لیے حاصل نہیں کر رہا،بلکہ ڈگریاں معاشی حالات بدلنے کے لیے اکٹھی کررہا ہے۔ اسی وجہ سے معاشرتی حالات تہذیبی اوراخلاقی تنزلی کا شکار ہیں۔

شیر شاہ سوری اِک اَن پڑھ مگر مثالی حکمران تھا۔ مذہبی رواداری و عدل میں اپنی مثال آپ تھا۔ عوام سے ٹیکس وصول کرنے میں سختی برتتا تھا۔رعایا کے جان و مال، عزت و آبرو کا خود کو ذمہ دار سمجھتا تھا۔ اگر کسی گاؤں میں کوئی چوری ہوتی تو تمام سرکاری اہلکار جیب سے نقصان پورا کرتے ۔ اگر کوئی قتل ہوتا اور قاتل گرفت اور سراغ سے بچ رہتا تو سربرائہ گاؤں کے سر قتل تصور ہوتا اور سزا کا حق دار ٹھہرتا۔

اِک مرتبہ شہزادہ پان منہ میں ڈالے ، ہاتھی پر سوار ہوکر شہر سے گزرا ۔ اس دوران ایک کسان کی بیوی کو غسل خانہ میں نہاتا دیکھ کر اُس پر پان کی پچکار پھینک ڈالی۔ وُہ غریب خاتون شرم سے پانی پانی ہوگئی۔ کسان نے ڈرتے ڈرتے شہنشائہ ہند شیر شاہ سوری سے فریاد کی۔ بادشاہ بڑا نادم ہوا۔ آخر یہ انصاف کیا، شہزادہ کی بیوی جو کہ بادشاہ کی بڑی بہو بھی تھی۔ اُس ہی غسل خانہ میں نہائے گی اور کسان ہاتھی پر سوار ہوکر گزرتے ہوئے اُسی طرح پان کی پچکار پھینکے گا۔ کسان نے فوری طور اپنی درخواست واپس لے لی ۔اس خیال سے کہ بادشاہ کی بہواُ س کی بھی عزت ہے۔

شیر شاہی عہد میں باہر سے جب کوئی تاجر ہندوستان میں داخل ہوتا تو دو فیصد ٹیکس تجار ادا کرتے تھے اور حکومت اُنکے تمام جان ومال کے تحفظ کی ذمہ دار ہوتی تھی۔کسی بھی نقصان کی صورت میں حکومت خصارہ پورا کرنے کی ذمہ دار تھی۔ پشاور سے بنگال تک پانچ مختلف شاہراہیں بنوائیں، بیشمار شاہرات مرمت بھی ہوئیں۔ ان تمام گزرگاہوں کے کنارے سایہ دار اور پھل دار درخت سہولت سفر کی غرض سے لگوائے۔ ہر چند کوس کے فاصلے پر مساجد و مدارس کے ساتھ سرائیں بنوائیں۔ عوام کے تحفظ کے لیے پولیس پیٹرولیم (گشت) کو اس قدر چاک و چوبند رکھا جاتا کہ ایک اکیلی خاتون رات کے اندھیرے میں بلا خوف و خطر سفر کر سکتی تھی۔

امن کے لیے سربراہان مملکت اور انتظامیہ پر لازم ذمہ داری ہے کہ عدل و انصاف، روزگار اور معاشی سہولیات میسر کریں۔

کبھی کبھی قومی مفادات کمزور قوتوں میں بدامنی رکھتے ہیں۔ بڑی طاقتیں خود تو امن کی زندگی بسر کرتی ہے۔ مگر امن کے نام پر کمزور اقوام پر یلغار جاری رکھتی ہے۔ وسائل کے حصول کی جنگ ہمیں آپس میں لڑائے ہوئے ہیں۔ کشمکش کی یہ پالیسی کیا دُنیا کی خارجہ پالیسی بدلنے کی جرات رکھتی ہے؟ دُنیا میں بدامنی دو طرح کے خطوں میں پیدا کی گئی ہے۔ جہاں وسائل کی دولت ریل پیل رکھتی ہے، وہاں سیاسی ناسور بویا گیا۔ جو ممالک ذہانت کی دولت رکھتے ہیں، اُن میں علمی اور علاقائی تنازعات پید اکر رکھے ہیں۔ کسی کے جذبات کو کسی اور کے خلاف بڑھکایا جا رہا ہے۔

حالت تو یہ کہ مجھ کو غموں سے نہیں فراغ  دِل سوزش درونی سے جلتا ہے جوں چراغ
(سینہ تمام چاک ہے، سارا جگر ہے داغ ہے مجلس میں نام میرا میر بے دماغ (میر تقی میر

دُنیا میں یہ امن کیوں قائم نہیں؟ ایک خاندان میں دو اَن پڑھ عورتیں جو سازشیںبُنتی ہیں۔ اپنے اَنجانے وقتی خیال کی تکمیل کی خاطررشتوں میں خلیج پیدا کرتی ہیں۔ ویسے ہی دُنیا کی بین الاقوامی سیاست ہے۔

اگرتعلیم رشتوں میں پڑی دراڑوں کو بھر سکتی ہے تو دُنیا میں امن بھی لاسکتی ہے۔ یہ تب ہی ممکن ہے جب آپ کی سوچ مثبت اور تعمیری ہو۔ ہم سب اپنی اپنی کپیسٹی میں خود کو امن سے رکھے اور ماحول کو بھی پُر امن بنائے۔بقول حیدر علی آتش

اپنے ہر شعر میں ہے معنیِ تہ دار آتش وُہ سمجھتے ہیں جو کچھ فہم و ذکا رکھتے ہیں
کمیں ہر معنی روشن، مکاں ہر بیتِ موزوں ہے غزل کہتے نہیں، ہم چند گھر آباد رکھتے ہیں

ادیب ،شاعر جنسیاتی موضوعات کی بجائے حقیقی محبت کی پرتیں کھولیں، علماءو فقہاءمسلکی مباحثی اختلافات کو ہوا دینے کی بجائے ادائیگی ارکانِ اسلام و اخلاقی تعلیم دیں، اساتذہ کرام علمی فوقیت کے ساتھ ساتھ عملی تاثیر کا اثر بھی پیدا کریں۔ والدین سکول میں داخل کروا کر ذمہ داریوں سے سبکدوش ہونے کی بجائے عملی تربیت کا فریضہ سر انجام دیں۔ کیونکہ ایک صحت مند دماغ اَمن قائم رکھتا ہے۔ دولت کی کمائی کی بجائے ، مخلص لوگوں کو کمائے اور رشتوں کے احترام کو نبھائے ۔ یہ رحمت خداوندی ہے۔

امن کی ابتداءاپنے مَن سے شروع کیجیے،ذمہ داریوں کو اللہ کی پوچھ گچھ کے خوف سے احسن طریقہ سے نبھائے، دوسروں کو دیکھ کر جلنے کی بجائے، اُن  کے ساتھ مل کر تعمیری عمل کا حصہ بنے۔ دُنیا کی ہر قوم کو اُس کی روایات ، اقدار اور مذہب کے فخر اور شان سے جینے دیں۔ میرا گھر میں جو خوبصورت رویہ بھائی کے ساتھ ہے۔ ویسا خوب سیرت رویہ میرا ہمسایوں کے ساتھ بنے۔ یہی عمل ریاستوں کی سطح پر درکار ہے۔ دُنیا میں چند تخریبی ذہن اپنے مفاد کے حصول کی خاطر اس راہ میں رکاوٹ ہے۔ بقول میر تقی میر:

چلتے ہو تو چمن کو چلئے، سنتے ہیں کہ بہاراں ہے
پات ہرے ہیں، پھول کھِلے ہیں، کم کم بادو باراں

(فرخ نور)

 مشکل الفاظ کے معنی
برگ: پتا
تجار: تاجر کی جمع
ذکا: ذہانت
سرائیں: ریسٹ ہاؤس
مرصع: نگینوں کا جڑاؤ، آراستہ کرنا، خوش بیانی
مرقع:مجموعہ، فوٹو البم، خطاطی کے قطعات (نمونہ) رکھنے کی کتاب ،ایسی مرمت شدہ شے جس میں پیوند لگے ہو

مکمل تحریر اور تبصرے >>>

انجانہ خوف

انجانہ خوف

 آج ہم زندگی فطری طرز کی بجائے غیر فطری انداز میں گزار رہے ہیں۔کہیں احساس محرومی کے بدلے معاشرہ کو احساس محرومی کا شکار کر رہے ہیں تو کبھی انجانے خوف اعصاب پہ مسلط ہیں۔اپنی بربادی یا بدنامی کے خوف سے دوسروں کی زندگیوں میں رواں دریا کے آگے بند باندھ رہے ہیں۔ آخر کب تک پانی کا بہاؤ روک پائیں گے؟ہماری زندگیاں کچھ ایسے ہی بیت رہی ہے، ہر لمحے ہمیں آتش فشاں پھٹنے کا خطرہ لاحق ہے۔ میں نہیں سمجھ سکا، لوگوں نے خوفِ خدا میں سے خدا کو نکال دیا اور پھر اتنے خوفزدہ کیوں ہیں؟عجب بات ہے ہم سب مانتے ہیں کہ خدا کی لاٹھی بے نیاز ہے۔

انسان جب اپنے ربّ سے سچی توبہ کرتا ہے تو وُہ گناہ دوبارہ سرزد نہیں ہوسکتا۔ گناہ کی فوری سزا خوف میں جکڑے جانا ہے۔ ہم روزانہ توبہ کرتے ہیں، روٹین کی توبہ! ہم اِس دُنیا کو مکافاتِ عمل مانتے ہیں مگر انجام کے متعلق انجان بنتے ہیں۔ شائید ہم زندگی کو زندگی کی طرز کی بجائے اپنے اندازِ اصول سے گزارنا چاہتے ہیں۔

ہم نہ جانے روزانہ کتنوں سے زیادتی کرتے ہیں۔ لوگوں کی ہائے لیتے ہیں۔ ہمیں ہمیشہ دوسروں کی بیشمار زیادتیاں تو نظرآتی ہے۔ کبھی یہ سوچا، ہم لوگوں سے کتنی زیادتیاں کرتے ہیں؟ کیا کبھی اپنی انجان زیادتیوں کا بھی کفارہ ادا کیا؟

حق تلفی کا علاج نہ دوا میں ہے ، نہ ہی دُعا میں۔ شائید تو بہ بھی کام نہ آئے، اگر کچھ ہے تو معافی میں، حقوق العباد میں۔ اگر مظلوم راہی عدم کا شکار ہوا۔ پھر کفارہ ہی کچھ کام آوے۔ یہ کیوں ہے، آج ہماری دولتیں (مال و اولاد) لُٹتی ہیں، عزت کی عمارات گر پڑتی ہے۔ کہیں یہ اللہ کی جانب سے آزمائش ہے تو کہیں ہمارے انجان خوف کا ٹوٹتا بند۔ ہم اپنے رزق اور عمل میں حلال و حرام کی  فلسفیانہ بحث الجھاتے ہیں۔افسوس! ان میں اصل تمیز اور پہچان بھول رہے ہیں۔ حرام نوالہ اور حرام خیال بھی نامعلوم خوف لاحق کرتا ہے۔ انجان بیماری!!۔

کبھی کبھی یہ انجانے خوف ہم خود پر زبردستی طاری کرتے ہیں۔ اللہ کے جلال پر تحریر و تقریر کرنے والے اللہ کا جمال نہیں بتاتے۔ سامعین و قارئین زبردست خوف میں مبتلا ، کوئی دُعا پڑھنا بھول گئے تو گنا ہ کا خوف، تلفظ میں معمولی سی غلطی انجانے میں ہوئی مگر گناہ کا خوف، زندگی کے اوراد ِ وظائف میں مصروف انسان اپنے اُوپر خوف اس قدرطاری کر لیتا ہے کہ ایسا معصوم انسان گھر سے باہر قدم نکالنے پر انجانے خوف و گھبراہٹ میںمبتلا ۔

میں جس معاشرہ کو دیکھ رہا ہوں۔ یہ بے لچک لوگوں کا بے لچک معاشرہ ہے، جہاں قدامت پرست اور باغی بستے ہیں۔ سیکولر کے نام پہ صرف صوفی نہیں، عیاش بھی بستے ہیں۔ صوفیا کی قدر ہم بڑی کرتے ہیں مگر اُنکی تعلیم پراب عمل کرتے نہیں۔ خود کو سیکولر، لبرل کہتے ہیں۔ وُہ بھول جاتے ہیں ، یہ کیاہوتے ہیں؟ دوسروں کی مرضی چھوڑنا، اپنی مرضی مار دینا اور حق فیصلہ کرنا لفظ سیکولر اور لبرل کی بنیادی اینٹوں میں سے ایک ہے۔ کچھ ایسا ہی معاملہ اِس پابند زندگی کا ہے۔

معاشرہ اور مذہب دونوں بدلتے حالات کے ساتھ ایڈجسٹ ہونے کی صلاحیت رکھتے ہیں۔ ایک آٹو میٹک ایڈجسٹ مینٹ سسٹم! مگر کیا ہوا؟ ہم نے مذہب کی ساری سختیاں اپنی زندگی میں داخل کی۔ اُن پابندیوں کا بیلنس کرنے کے لیے مذہب کچھ نرمیاں بھی دیتا ہے ، وہاں ثقافت کی روایات عائد کر دی۔ ثقافت کی لچک مذہب میں گناہ کے تصور سے ہٹا دی گئی۔ مذہب کی نرمی صدیوں کی روایات کے نام پر قیدی بنا لی گئی۔ باقی کیا بچا؟ نرمیاں کٹ گئیں، سختیاں بچ گئیں۔مذہب و ثقافت کی لچک تصورمیں رہ گئی۔اپنے ہی نظام سے بے چینی اُبھرنے لگی۔لوگ پابندیوں میں بے راہی زندگی کے مسافر بن رہے ہیں۔

ہم لفظ ”محبت“ سے واقف ہی نہیں۔ رشتوں پرا سٹیٹس کی پابندی لگا رکھی ہے تو کہیں گھٹیا سوچ والی سیاست نے ہمیں اُچاٹ کر رکھا ہے۔ خدا نے عیب جوئی سے منع فرمایا ہے۔ ہمیں چسکا دار برائیاں و گپیں لگانے کا شوق ملا ہے۔ہمارے یہ تربیتی رویے اُولاد کے انجانے خوف میں مبتلا رکھتے ہیں۔

ہم تبصرہ کرنے والی قوم بن چکے ہیں۔ تبصرہ کرنا، اَن پڑھ رویہ تھا۔ اب یہ تعلیم یافتہ طبقہ میں رواج پڑ چکا ہے۔ صبر کرنا تو دور کی بات، ہم تو بات سننا بھی مشکل سمجھتے ہیں۔ جیسے بولنا ایک خوراک ہے ایسے ہی سننا بھی ایک خوراک ہے۔ سن کر اعصاب قائم رہتے ہیں اور بول کر ذہن کو تسکین ملتی ہے۔ جب آپکی بات پہ توجہ دینے والا کوئی نہ رہے گا۔ انجانہ خوف کو آپ خود اپنا ساتھی بنائے گے۔

کچھ لوگوں کو اپنی اُولاد کا انجانہ خوف ہے۔تربیت، تعلیم، رزق کے خلل کا خوف نہیں۔ والدین کو سنبھالنے کا انجانہ خوف۔شائید اپنے کسی انجان عمل کا خوف!

یہ زندگی سڑک کے ایک حادثہ کی مانند ہے۔ جہاں آپ حادثہ سے تو بچ رہے ہیں مگر اَن ٹرینڈ ڈرائیور نے آپکو حادثہ سے دوچار کیا۔ زندگی میں رشتے اعتبار سے جنم لیتے ہیں اور اعتبار کو شک کھا جاتا ہے۔ آج گھریلو زندگی شک سے انجانے خوف پیدا کر رہی ہے۔ کہیں ہمارا مستقبل بھی بہادر شاہ ظفر جیسے مظلوم و بے اختیار شہنشاہ ِہند والا نہ ہو۔ جو خفیہ طور پر جنگ آزادی کی تیاریوں میں تو مصروف تھا مگراُس کے اپنے دِل کے سواءکسی نے اُس سے وفا نہ کی۔ملکہ زینت محل نے ولی عہد شہزادہ فخرو کو زہر سے مارڈالا، حکیم احسن اللہ خان نے شاہِ دلی کو مقبرہِ ہمایوں سے گرفتار کروایا۔ خوش نصیب تھا بادشاہ ابوظفر انجانے خوف کا طوق جس نے اُتار پھینکا۔ وفا سب سے نبھائی، دھرتی کو لیلٰی جان کر اپنا مقام خود لکھا۔

میں برسوں سے انجانے خوف کی جڑ کی تلاش کر رہا ہوں۔ ہم نے زندگی کو جب زندگی کی روش سے چھینا تو انجانہ خوف ہم میں وارد ہوا۔ کبھی ہم شکار ہوئے تو کبھی کوئی ہمارا شکار بنا۔

تاؤ تے چنگ میں پانی سے متعلق کچھ یو ں درج ہے: پانی دُنیا کی نرم ترین شے ہے جو ہاتھ میں بھی قابونہ آئے اور جب اِسکو روکا جائے تو یہ دُنیا کی سخت ترین شے ہے کہ یہ ہر رکاوٹ کو توڑ کر بہاءلیجا تا ہے۔ ایسے ہی انسانی خواہشات آپ کے اندر جنم لیتی ہے مگر یہ ختم کبھی نہیں ہوتی۔ اِنکی تکمیل میں آپ کی ذات ختم ہوجاتی ہے۔ مگر یہ کبھی ختم نہیںہوتی۔

ہمارے بیشتر خوف خواہشات کے حصول میں جنم لیتے ہیں۔ ہمارا اکثر ذہنی امراض انجانہ خوف میں جانے گئے، جو بے عمل رویہ میں ہوتا ہے۔

اگر انجانہ خوف آپکے گھٹیا رویوں سے جنم لیتا ہے تو کہیں لوگوں کے گھٹیا رویے آپکو اس میں مبتلا رکھے گے۔

(فرخ نور)

مکمل تحریر اور تبصرے >>>