کیا پاکستان ٹوٹ رہا ہے

کیا پاکستان ٹوٹ رہا ہے

روزنامہ جنگ کے مطابق برطانوی اخبار نے دعویٰ کیا ہے کہ پاکستان ٹکڑوں میں تقسیم ہونے کی طرف بڑھ رہا ہے، اسلام آباد سویلین حکومت کے خاتمے اور فوجی بغاوت کے دھانے پر ہے، صدارتی استثنیٰ کے معاملے پر وزیر اعظم گیلانی اور سپریم کورٹ آمنے سامنے ہوں گے ، پاکستانی عوام متواتر بحرانوں سے نبرد آزما ہے لیکن قیادت عملی اقدامات کیلئے تیار نہیں یا قابل نہیں۔ برطانوی اخبار ’انڈیپنڈنٹ‘ نے ایک تفصیلی مضمون ”کیا پاکستان ٹوٹ رہا ہے“ میں لکھا ہے کہ پاکستان کے پاس ایٹمی ہتھیار تو موجود ہیں لیکن اس کے بچے بھوک سے مر رہے ہیں، ملک کا خانہ جنگی کی طرف جانا مسئلہ نہیں بلکہ اتنے بڑے بحرانوں کے باوجود کوئی انقلاب یا تبدیلی نہ آنا اصل مسئلہ ہے۔ اخبار لکھتا ہے کہ پاکستان ایک تباہی کے بعد دوسری تباہی کا سامنا کر رہا ہے، اس کے عوام بحران در بحران سے گزر رہے ہیں اور اس کے رہنما عملی اقدام کیلئے تیار نہیں یا قابل نہیں۔بہت سے لوگوں کے نزدیک پاکستان ایک ناکام ریاست ہے۔ اخبار کہتا ہے کہ پاکستان انتشار کا شکار ہے اور ریاست اور معاشرہ مسلسل قدرتی آفات اور سیاسی بحرانات کے تحت الگ ہونے کی طرف گامزن ہے۔ملک اس وقت حکومت کے جانے اور فوجی بغاوتوں کی افواہوں کی زد میں ہے۔وسیع پیمانے پر تباہی پھیلانے والے سیلاب کو شہہ سرخیوں سے غائب کردیاگیا ہے۔ لاکھوں کسان اپنے تباہ شدہ دیہاتوں میں بے بسی کی تصویر بنے بیٹھے ہیں۔امریکا پاکستان کے مغربی حصوں میں ڈرونز حملوں میں انتہائی شدت لا چکا ہے۔پاکستان نے نیٹو کی سپلائی لائن معطل کی ہوئی ہے اور امریکی ہیلی کاپٹر سرحد پار کر کے پاکستانی فوجیوں کو شہید کر رہے ہیں۔اس میں کوئی شک نہیں کہ پاکستان پر برے حالات ہیں۔روس سے زیادہ آبادی کا حامل ملک پاکستان کئی غلطیوں کو برداشت کرنے کی سزا کے قابل ہے تاہم اب یہ ٹکڑوں میں بٹنے کی طرف بڑھ رہا ہے۔ اس کے پاس ایٹمی ہتھیار تو ہیں لیکن اس کے بچے بھوک سے مر رہے ہیں۔ پاکستان کی 6 لاکھ 17ہزار فوجیوں پر مشتمل فوج دنیا کی سب سے مضبوط ترین فوج ہے لیکن اس کی حکومت پولیو یا ملیریا جیسی بیماری کو ختم نہیں کرسکتی۔ہر کوئی کہتا ہے کہ پاکستان کو دنیا میں ترقی کیلئے اعلیٰ تعلیم کے حصول کی طرف توجہ دینی چاہیے لیکن یونیورسٹیاں پیسے نہ ملنے کی وجہ سے ہڑتال پر ہیں۔ اخبار کے مطابق پاکستان کے وزیراعظم یوسف رضا گیلانی آئندہ ہفتوں میں سپریم کورٹ آف پاکستان سے صدر آصف علی زرداری کے دیئے گئے استشنیٰ کے خلاف قانونی جنگ کریں گے، جب کہ صدر بننے سے قبل آصف زردراری کی شہرت ایک کرپٹ شخص کے طور پر جانی جاتی ہے۔